Roxas City, Capiz -Matalunsay nga naka-abot sa probinsiya sang Capiz kahapon nga adlaw ang 162 ka mga repatriated Overseas Filipino Workers(OFWs) kag locally stranded individuals(LSIs) nga halin sa Metro Manila kag Luzon area sakay sa sweeper flight sang Air Asia paagi man sa pagpatikasog sang provincial government.
Sa interview sang news team, ginpahayag ni Capiz Governor Esteban Evan ‘Nonoy’ Contreras nga natigayon nga makapauli pabalik sa probinsya ang amu nga mga OFWs kag LSIs matapos ang koordinasyon sang gobyerno sa mga ini kun sa diin ang provincial government amu naman ang naghikot sang libre nga rapid test, travel authority kag plane ticket sang amu nga mga persona.
Samtang ginpahayag dugang ni Contreras, nakabaton man ang mga ini sang assistance halin sa provincial government balor P2, 000 nga ginhatag mismo kahapon nga adlaw sa ila nga pagtapak sa Roxas City Airport.
Ginsiling sang gobernador nga base sa iya assessment, handa na ang Roxas City Airport pananglitan nga magabalik ang operasyon para sa pagbaton sang mga commercial flights.
Samtang may kaangtanan sini, ginpasalamatan naman sang gobernador ang tanan nga mga nagbulig sa ila agud nga mangin matalunsay kag mapadali ang pagpauli sang nasambitan nga batch sang mga LSIs kag mga OFW repatriates kahapon nga adlaw.
