General Santos City–Giandam na karon sa Police Station 6 ang kasong carnapping batok sa usa ka 17 anyos nga si alyas AJ nga nanimuyo sa Barangay Glamang, Polomolok, South Cotabato human nga masikop kini sa gipahigayon nga hot pursuit operation sa mga personahe sa Police Station 6 sa dihang gikawat niini ang motor sa biktima nga si Charlie Mata, 25 anyos, trabahante sa usaka dakong Mall sa Gensan ug nanimuyo sa Barangay Calumpang.
Sumala pa ni Police Major Tirsu Pascual ang hepe sa Police Station 6 nga human mireport sa ilahang buhatan ang nasampit nga biktima nga gikawat sa wala mailhing suspect ang iyahang skygo 125 nga dunay plate number LD1559 gilayon silang nag pahigayon ug pursuit operation uban ang biktima kung asa nakita sa tag-ya ang iyahang motor nga ginamanihuan sa suspect sa P. Acharon Blvd.
Daling gigukod sa kapulisan ang suspect nga nakabantay usab ug gibilin ang motor dayung dagan sa ngit-ngit nga bahin sa maong lugar kung asa mitago kini sa mga tag-as nga mga tanom nga gabi sa canal aron nga dili makit-an.
Maayo nalang matud pa nga adunay mga tambay nga nakakita sa batan-on ug mi tug-an sa kapulisan kung asa nakumbinsi man usab sa otoridad ang suspect nga mutahan sa iyahang kaugalingon.
Sa kasamtangan giturn-over na sa Station 6 ang suspect sa CSWDO.
Samtang giangkon sa suspect nga si alyas AJ ang salaod ug mikanayon nga natripan lang niini nga kawaton ang maong motor aron gamiton sa Joy Ride.
Dugang pa niini nga mao matud pa kini ang unang higayon nga siya nanguhag motor.
Gihangyo usab sa suspek ang tag-iya sa motor nga iyang gikawat nga siya pasayluon aronnga makabalik kini sa iyang trabaho isip dispatcher sa van apan sa pagsuwat niining balita, wala pa gibutyag kung pasayluon ba sa biktima ang minor de edad.(Dave Silagan)
(Photo is for illustration only)
