Dipolog City – Bayente ka samad linubaan ang naangkon sa usa ka 17 anyos nga dalaga human giluba-luba sa gikalambigit niining lalaki, hinungdan sa hinanaling niining kamatayon, badang alas 11:10 sa buntag niadtong adlaw sabado sulod sa usa ka boardinghouse sa may Prk. 7, Brgy. Sta. Isabel sakop ning siyudad sa Dipolog.
Ang biktima giila sa kapolisan nga si Alina T. Emoy, dalaga, tindera sa panaderya nga taga Brgy. Galas ug temporaryong nangabang boardinghouse sa dapit hitaboan.
Samtang ang responsable sa krimen mao ang kanhi niining amo sa lungsod sa Sindangan ning lalawigan, nga si Nilo Culanag Elumbaring, 64 anyos, usa ka minyo, negosyante ug molopyo sa Brgy. Miputak ning siyudad.
Usa sa gisubay karon sa imbistigasyon ni SPO3 Edrin Aquino, ang imbistigador sa kaso, mao ang tago matud pa nga relasyon sa duha.
Kondiin atol sa hitabo wa kapugong sa kaugalingon ang suspek, nagselos sumala pa kini human nadiskobrehan niya nga dunay laing gikalambigit ang dalaga maoy hinugdan, gisulod kini sa giabangan boardinghouse ug giluba-luba sa makadaghang higayon gamit ang usa ka kutsilyo.
Ang biktima nakahiagom ug daghanang samad linubaan sa nakadaiyang bahin sa iyang lawas hinungdan sa diha-diha nga kamatayon.
Samtang ang suspek human nabuhat ang krimen, nag-unay usab kini ug hansak sa kutsilyo diha iyang dughan apan nadali kini ug tabang, gidala sa neresponding kapolisan didto sa Zamboanga del Norte Medical Center aron katambalan ug sa kasamtangan anaa na sa luwas nga kahimtang kinsa bantay sarado na karon sa mga pulis.
Ang patay lawas sa biktima gilamayan na sa nahabiling pamilya, kansang singit hustisya.
(C.Photo)
