Na-rescue sa mga puwersa sa Cagayan de Oro City Police Office (COCPO) ubos sa Police Station 1 ang usa ka 17 anyos nga lalaki nga biktima sa gi-ingong pagpangidnap sa lungsod sa Maramag, Bukidnon.
Matud ni alyas Jun Jun nga gipugos siya’g pasakay sa usa ka color maroon nga van, 50 metros gikan sa iyang tunghaan sa Philippine Countryville College Inc. samtang pauli na unta siya.
Sigun sa kapulisan sa Police Station 1 sa COCPO nga human makadawat sila sa flash alarm gikan Maramag Municipal Police Station kalabot sa maroon nga van nga gitoohang nangidnap sa magtutungha, maong milusad sa pagpatrolya ang ilang grupo kagabie.
Samtang nagpatrolya, nakakita ang kapulisan ug usa ka menor de edad nga nagtindog nga daw nangayo ug tabang sa dalan Tirso Neri Tiano Street sa mao nga siyudad alas 9:24 kagabie.
Giduol sa mga nirespondeng police officer ang menor de edad, ug nangayo kini ug tabang tungod kay gikidnap matud pa siya ug nakalingkawas gikan sa mga suspek.
Human nga naluwas sa kapulisan giturn-over na usab kini sa iyang amahan nga taga Kitaotao, Bukidnon kauban ang kapulisan sa PNP-Kitaotao.
