Nag-umpisa na sang Abril 1 sa ila pagtrabaho sa provincial government ang yara sa 176 tanan ka mga benepisyaryo sang una nga batch sang Summer Special Program for Employment of Students ukon Summer SPES.
Suno kay Public Employment Service Office (PESO) Manager Flora Cavan nga ang nasambit nga mga SPES beneficiaries ang gindesignar sa nagkalain lain nga opisina sa kapitolyo kag mga munisipyo.
Antes ang mga ini gindeploy, ginpaidalom ang mga benepisyaryo sa orientation upod ang ila mga ginikanan may angot sa mga rules sa pagpanarbaho sa gobyerno kag ang proseso sang programa partikular ang sweldo. Ang pagtrabaho sang first batch sang Summer SPES ang magatakop sa May 2.
Ang SPES ang isa ka programa sa idalom sang Department of Labor and Employment kaupod ang provincial government nga may tinutuyo nga mabuligan ang mga pigado apang deserving nga mga estudyante nga makaangkon sang trabaho kag sweldo nga ila magamit sa pagbukas sang klase sa Hunyo.
Ang mga benepisyaryo ang makabaton sang sweldo nga P 477 kada adlaw kon sa diin 60% sini ang pagabayran sang provincial government samtang 40% naman ang counterpart sang DOLE.
