Davao City – Pagpakaylap pa sa ‘Culture of Security’ sa matag residente sa syudad sa Davao batok terorismo.
Kini mao ang usa sa unod sa mensahe ni Davao City Mayor Sara Duterte Carpio kinsa nangulo sa ika-17 nga komemorasyon sa Old Davao Airport Bombing sa Sasa ning dakbayan karong adlawa.
Gipaniguro ni Duterte-Carpio nga nagpabiling alerto ug commited nga protektahan ang syudad batok terorismo sabay awhag nga makigkooperar sa Task Force Davao ug Davao City Police Office (DCPO).
“Bisan pa man wala nahitabo sa imuha it doesn’t mean dili na mahitabo sa imuha in the future kung dili ka mutabang, kung dili ka manigurado, kung dili ka mu-cooperate sa TFD, DCPO maong gipropagate nato pirmi ang culture of security. Dili ni trabaho lang sa security apan kanatong tanan… anytime it can happen of we let our guards down,” segun niini.
Dugang sa alkalde nga nagpadayon ang suporta sa lokal nga panggamhanan sa mga anak sa biktima ug nasamdan pinaagi sa City Social Services and Development Office (CSSDO) ug Educational Benefits System Unit (EBSU).
Nagpahigayon og candle lighting atol sa komemorasyon nga gitambongan sa survivors, executive heads, uniformed personnel sa security cluster, kabanay ug higala sa mga biktima ug representante sa private sector.
Kahinumdoman nga Marso 3, 2003 nahitabo ang pagpamomba sa Sasa Old Airport diin 17 ka tawo ang patay ug ubay-ubay ang nasamdan diin ang maong lugar gitukoran sa opisina sa Mindanao Development Authority (MinDA).
RadyoMaN Jason Amisola
