General Santos City–Padayon nga nagpaalim sa iyang mga samad ang usa ka batan-ong lalake nga si Ben Jalmin Husin, 18 anyos, lumulupyo sa Purok Kulasi, Brgy. Labangal, General Santos City.
Matud pa ni Liza Jalmin Husin, 24-anyos, lumulupyo sa nasangpit nga lugar nga pasado alas 5 sa hapon dihang nadunggaban ang iyang igsoon sa usa ka 40-anyos nga si Joel Araham, minyo ug lumulopyo sa Purok Kulasi, Brgy. Labangal, General Santos City.
Matud pa sa inisyal nga imbestigasyon sa kapulisan, mga alas 4:30 sa hapon, nakig-inom ang suspek sa balay ni Alyas Kokoy kauban si Morphy Alpad ug Alyas Walid sa dihang nagkabikil sila gumikan sa kahubog, gigukod ni Joel Araham si Morphy Alpad. Dihang kini nakit-an sa biktima iya kining giuwang aron dili mudako ang away sa mga nasangpit.
Pagkahuman sa 30 ka minuto, ang biktima matud pa nagdula ug bilyar sa maong lugar didto na kini giduol sa suspek dayon kalit siya nga gidunggab sa suspek gamit ang kutsilyo igo sa nagkalain-laing parte sa kalawasan mao nga siya gidala sa Dr. Jorge P. Royeca Hospital.
Sa karon padayon pang ginapangita sa kapulisan ang suspek nga si Joel Araham samtang giandad na karon ang pag pasang-at ug kaso batok sa suspek. (Synymer Carisma Obena)
