18 anyos nalumos-patay sa wakeboard lake

Davao City – Nalumos-patay ang usa ka 18 anyos nga lalaki alas 4:20 kagahapon nga nahitabo sa Deca Wakeboard Park, sa Deca Homes Brgy. Tacunan, Tugbok District ning dakbayan.

Sa report sa kapulisan, giila ang biktima nga si James Cuestas Alcuezar, 18 anyos, residente sa nasangpit nga lugar.

Sa inisyal nga imbestigasyon, milangoy matud pa ang biktima sa wakeboard lake imbes nga mugamit og improvised nga bangka apan pag abot sa tunga-tunga, nalumos kini ug nahanaw sa tubig nga adunay 8 feet ang gilawmon.


Dali kini gipangita sa mga rescuers human sa 15 ka minuto apan pagdala sa ospital, deklarado na kining dead on arrival.

Sa pikas bahin, gituohang nasangit sa pukot hinungdan nga nalumos-patay ang usa ka lalaki human nangisda sa kanal nahitabo sa Brgy. Tanglaw, Braulio E Dujali, Davao del Norte

Sumala sa Dujali PNP, naila ang biktima nga usa ka Rogelio Polinar diin posibleng nasangit kini sa pukot ug nahulog sa kanal samtang sumala sa live in partner niini nga aduna kini hypertension nga ginalataw pud nga hinungdan sa pagkamatay.

RadyoMaN Renz Barbarona

Facebook Comments