General Santos City—Unang nasampulan sa Comelec Gun ban ang usa ka 18 anyos nga si Dex Cañete, residenti sa Purok Ngilay, barangay Tambler, Gensan human kining nasikop sa Operatiba sa kapulisan didto sa lungsod sa Kiamba, Sarangani Province.
Subay sa report sa Police Station 2, una nang gireklamo sa pamilyang Ngilay ug pamilyang LIagas ang nasangpit nga suspek human matud pa iyang gikuha ang duha ka unit sa mahalong cellphone ug P30,000.00 nga gipanag-iyahan sa mga nahisgutan.
Gilayon nga naghimo ug makuting imbistigasyon ang kapulisan ug nasuta nga milakaw matud pa ang suspek kuyog sa iyang uyab sa kiamba mao nga nakig-alayon ang Police Station 5 sa Kiamba PNP aron nga sikopon ang suspek.
Malampuson usab kining nadakpan ug narekober gikan sa iyang posisyon ang duha ka cellphone ug usa ka unit sa magnum.22 revolver.
Sa pakighinabi sa RMN Gensan ngadto sa suspek, iyang giangkon nga gikuha niini ang cellphone apan gipanghimakak niini nga iyang gikuha ang P30,000.00 nga gipasangil kaniya sa mga reklamante.
Sa karon pabiling balhog sa silda sa Police Station 5 ang suspek samtang ginaandam na usab ang kasong posibling atubangon niini.
