Dinas, Zamboanga del Sur – Padayun pa nga nagpaalim sa mga samad pinusilan ang usa ka estudyante human kini gipusil kaniadtong nakalabayng gabie sa Purok Saging, Barangay Sungayan, lungsod sa Dinas, Zamboanga del Sur.
Ang biktima nailang si Yang-yang Basaya Karim, 18 anyos, dalaga, usa ka estudyante sa JH Cerilles State College ug residente sa nasangpit nga dapit.
Sa imbestigasyon sa Dinas PNP nasayran nga pauli na ang biktima gikan sa iyang tulunghaan paingon sa ilang balay sakay sa single motor RUSI 110, apan sa kalit miduol ang wala mailhing mga suspetsado ug gipusil siya sa makaduhang higayon gamit ang wala pa masayring calibre sa armas.
Naigo ang biktima ug nakaangkon ug duha ka samad pinusilan sa iyang wala nga tiyan ug daling gidala ngadto sa Chavez Medical Clinic arun katambalan apan gibalhin kini ngadto sa Aizah Medical Hospital, Pagadian City alang sa dugang medikasyon.
Nagpahigayon na ug hot pursuit operation ang mga personahe sa Dinas MPS arun sa posibleng pag-ila ug pagsikop sa nasangpit nga mga suspetsado.
Kasamtangang gisuta pa usab sa otoridad ang motibo sa nasangpit nga pagpamusil.
