Nagalab-ot sa 188 ka anti-illegal drug operations ang napatigayon sang kapolisan sa bug-os nga probinsya sang South Cotabato halin Enero tubtob Mayo subong nga tuig.
Sa nasambit nga operasyon suno kay Police Supt. Marvin Duadua, Community Relations Officer sang South Cotabato PNP yara sa 216 ka mga drugs suspects ang naaresto sa probinsya sa sulod sang anum ka bulan.
Ginkumpirmar ni Police Supt. Duadua nga sa nasambit nga numero yara sa 165 ang pusher, 36 ang user, 14 ang pusher kag user sa diin 276 naman ang nafile nga kaso sa korte.
May apat man suno pa ka mga menor de edad kag isa ka cultivator ang naaresto sa nasambit nga anti-drug operation.
Yara naman sa 5, 590 ka gramo sang marijuana ang nakumpiskar kag sa shabu 223 ka gramo nga sa kabug-usan nagakantidad sang masobra P1.9 million.
Nagapanguna naman ang banwa sang Polomolok nga may madamo nga nadakpan nga drug suspects nga yara sa 69, ginasundan sang Koronadal City nga may 52 nagasunod man suno pa ang banwa sang Sto. Niño, Tampakan kag Banga.
Ginkumpirmar man ni Duadua nga 10 naman ka mga suspek ang napatay matapos suno pa nga nagbato sa ginpatigayon ang operasyon batok sa ila.
Ginpasiguro man sini nga padayon ang anti-drugs operation sang kapolisan dire sa probinsya.
