Patay ro sangka 19 anyos nga binatilyo matapos nga magbigti kabii sa Barangay Balabag sa banwa it Malay sa isla it Boracay.
Do biktima hay nakita eon lamang ko ana nga nanay nga nakabitay sa anang suoed it kwarto matapos nana kara nga buksan do bintana bangod nga uwa raya ga sabat kat pukawon kabii para mag ihapon.
Do biktima hay nakilaeang si Norman Broncano ag residente man it nasambit nga lugar.
Dikara tumiyabaw do nanay ko biktima ay nagpangayo it bulig para nga mabuoe sa pagkabitay do ana nga unga kung siin gamit nana kara sa papakamatay hay ro electrical cord.
Ging disidiran pa ko pamilya nga daehon sa sangka private clinic do biktima pero uwa eon daya naeowas ag ging deklara nga dead on arrival.
Samtang gina sugid nga nag angkon it mainitan nga diskusyon do biktima ag ro ana nga tatay bangod nga ko nagtaliwan nga gabii hay umuli raya nga sarado do andang baeay halin sa inuman ag daya hay ging kaakig nana.
Naghambae pa suno raya sa anang tatay nga magpa kamatay nga uwa man ging seryoso ko pamilya hasta nga ging tuman na matuod ro ana nga ging hambae.
Sa makaron naga padayon do imbestigayon it Boracay PNP sa kung ano gid do matuod nga rason ko pagpakamatay ko biktima.
