19 anyos nakuryentihan-patay sa Brgy. Mat-I, Surigao City
Nakuryentihan ug namatay an isa ka 19 anyos na laborer sa Sitio Bulala, Purok 8, Brgy. Mat-I, Surigao City.
Tagkilaya an biktima na si Aldrin Pagalan Cuizon, ulitawo, residente nan Sitio Togonan, Brgy. Mabini. Ini nakuryentihan sa may rooftop nan panimayay na tagpanag-ija ni Grace Cortes. Sa asoy sa mga nakasaksi, si Cuizon kaiban an amahan an nagtrabaho sa panimayay nan mga Cortes. Samtang didto sa rooftop an biktima, ini an nagdawat nan minasa na semento gikan sa ubos pasingod sa taas. Hinoon dili pisi an gamit niini sa pagpasaka sa minasa na semento kundili steel bar. Sa sige na pagbira niini, nosangko an steel bar ug nosaghid sa livewire nan Surigao del Norte Electric Cooperative o SURNECO, rason sa pagkakuryenti niini.
Si Cuizon an nakaangkon nan danyos sa duha ka siki ug iban pa na bahin sa lawas. Ini tagdali pa pagdaya sa isa ka hospital pero tagdeklarar na dead on arrival nan doktor.
