Sarangani Province—Balhog sa silda sa Alabel, Municipal Police Station ang usa ka Brian Javinao Nerves, 19, residenti sa Barangay Baluntay, Alabel, Sarangani Province kansa suspek sa pagpangawat sa bag sa biktimang si Estela Juanite, legal age, magtutudlo ug residenti sa Barangay Kawas, Alabel, Sarangani Province.
Sa inisyal nga imbistigasyon sa Alabel PNP nasayran nga alas 5:45 ang takna sa hapon kagahapong adlawa June 4, 2019, midangop sa buhatan sa kapulisan ang biktima aron ireport ang pagkawala sa bag niini sulod sa iyang classroom sa usa ka tunghaan sa barangay Baluntay, Alabel nga adunay sulod nga Cellphone, mga personal nga gamit ug kwarta nga nagkantidad ug P25,000.00.
Gilayong naghimo ug aksyon ang Alabel PNP pinaagi sa pag trace sa location sa cellphone sa biktima pinaagi sa gps phone tracker application.
Nasuta nga anaa sa may Baluntay, Alabel ang suspek kansa gilayong girespondihan sa kapulisan nga miresulta sa pagkasikop niini.
Narekober sa posisyon sa suspek ang cellphone sa biktima ingon man ang nahibiling cash nga nagkantidad ug kapin P10,500.00.
Giangkon usab sa suspek ang krimen nga gihimo. Samtang sa pagsuwat ning balita, ginapaabot pa sa Alabel PNP ang desisyon sa biktima kung iyang pasakaan ug kaso ang suspetsado.
