Gipresenta sa mga kasundaluan ngadto sa katawhan ang 19 ka mga kanhi rebeldeng New People’s Army (NPA) lakip ang 12 ka mga kalibre sa armas kagahapon didto sa Purok-5, Sitio Mahayag, Brgy. St. Peter, Malaybalay City, Bukidnon.
Gipangunahan ni LTC. Edgardo Talaroc Jr., ang Commanding officer sa 8th Infantry Battalion sa Philippine Army ang pagpresenta inubanan sa mga representanti sa Indigenous People’s Mandatory Representative (IPMR) sa dakbayan sa Malaybalay ug sa probinsya sa Bukidnon.
Gikatahong mitahan ang mga kanhi rebelled ngadto sa 8th Infantry Battalion sa mga bulan sa Marso, Setyembre ug karong bulan sa Oktubre karong tuiga.
Gisulti ni LTC. Talaroc nga ang maong pagtahan resulta sa makanunayong pagpatuman sa mga operasyon sa kasundaluan ug gumikan na usab sa kakapuy ug kalisud nga gibati sa mga kanhi rebeldeng NPA sa kinabuhi sa bukid.
Mapasaligon si LCT. Talaroc nga padayon nilang suportaan ang mga mitahan gikan sa pagpahatag og panginabuhian, financial assistance ug pagpaeskwela.
