MIKABAT ngadto sa 1,914 ka mga kliyente ang nahatagan ug legal nga tabang sa Provincial Legal Office (PLO).
Basi sa gisumite nga accomplishment report ni Provincial Legal Officer Atty. Paul Vincent G. Villegas ngadto sa Provincial Planning and Development Office (PPDO) nga ang maong mga kliyente mga kabus ug nanginahanglan sa tabang-legal nga gi-refer usab ni Governor Zubiri sa ilang buhatan, diin kini ilang nahatagan ug mga legal nga opinyon, mga impormasyon, transaksyon, kasabutan, kontrata, kasulatan aron maaksyonan ug daghan pang uban.
Ang PLO nakaandam ug nakabuhat usab ug 271 ka mga legal documents ug 3,390 ka mga notaryo lakip na niini ang mga kontrata, Memorandum of Agreement (MOA), Deed of Donation, Affidavits ug daghan pang uban.
Nakahatag usab ang maong buhatan ug legal nga opinyon ngadto sa Gobernador, mga mayor o sanggunian sa probinsya kung adunay hisgutanan sa balaudnon, nagrepaso sa mga kontrata, ug naghatag ug mga rekomendasyon, imbestigasyon komento ug legal nga opinyon. Nag-representar usab ang PLO sa tanang sibil nga kalihukan ug mga special proceedings diin sa tuig 2020, 5 ka kaso sa korte ang gihawiran sa ilang opisina diin ang Provincial Legal Officer ang nahimong Chief Legal Counsel sa ngalan sa Provincial Government of Bukidnon diha sa mga hearings in Civil and Special Proceedings.
Ang PLO nakabuhat usab sa 1,008 ka mga sulat diin 883 niini alang sa komunikasyon, rekomendasyon, sulat hangyo ug endorsement, ug 125 ka mga memoranda, authority to travel ug certifications. Nakatabang usab sila sa pagpahigayon ug panagtigum sa benepisyaryo sa Provincial Real Estate and Housing Development Division (REHDD) sa mga kaso sa wala nakabayad ug nakahimo ug demand letters ngadto sa mga delinkwente nga mga benepisyaryo sa livelihood program sa probinsya.
Nakahimo usab sila ug 14 ka mga Executive Orders and Advisories may kalambigitan sa COVID-19 pandemic nga aprobado sa Gobernador ug nakatambong sa mga panagtigum sa Inter-Agency Task Force (IATF) aron hisgutan ang mga guidelines ug health protocols nga ipatuman sa probinsya.
Ila usab natabangan ang mikabat ngadto sa 110 ka mga pangutana diha sa ilang official facebook account nga ProvincialLegal Office-Bukidnon ug 62 ka mga pangutana sa ilang official hotline nga 813-3236 ug 09056468617.
Usa sa mga major project sa PLO ug Provincial Social Welfare and Develoment Office (PSWDO) sa tuig 2021 mao ang pagmugna sa Governor’s Legal Aid Program o GLAP nga basi sa Resolution No. 2020-1698 sa 26th SP nga nagtugot kang Provincial Legal Officer Atty. Paul Vincent G. Villegas sa pagsulod sa Contract of Service kauban sa mga abogado nga nagtumong nga makahatag ug diha-diha dayon nga tabang-legal sa mga giabusahang mga kabataan ug mga kababayen-an ilabi na ang mga biktima sa labor and sexual human trafficking. Pinaagi sa maong programa, ang mga biktima nga naapektuhan sa pagsaka sa mga krimen ug pagpangabuso daling makaduol ug mahatagan ug legal nga mga tambag ug serbisyo pinaagi sa mga propesyonal ug eksperto sa legal nga hisgutanan ug uban pang hingtungdang ahensya. Gipahigayon ang virtual launched sa GLAP kaniadtong Septembre 22, 2020 sa pinaagi sa Provincial Legal Office ug LGU Bukidnon Official Facebook Account.
