Davao City – Gibana-banaang kapin kun kulang 2.1 milyones ka pesos ang damyos sa sunog sa Sta. Maria Dumanlas, Brgy. Buhangin Proper, Davao City alas-2:10 karong hapon, Mayo 25, 2020.
Sa interbyu sa DXDC RMN Davao kang Senior Fire Officer (SFO) 2 Segundo Dumasig Jr. sa Buhangin Fire Station, gibutyag niini nga pito ka balay ang nasunog, upat niini ang naugdaw ug tulo ang partially damaged.
Subay sa imbestigasyon nagsugod ang sunog sa balay sa usa ka Clara Lampa, 81-anyos ug electrical short circuit ang ginatan-aw’ng hinungdan sa insidente.
“Last year, ingon ana gihapon nasunog, electrical gihapon. Daan naman gud kaayo nga balay. Siguro ang mga wirings niya tungod sa ka-daan, naa bay nangagisi ato, gi-kuan ba’g ilaga,” segun ni Dumasig.
Alas-3:17 sa hapon usab na-kontrola ang sunog ug walay natalang ‘injured’ sa insidente.
Pahimangno sa kabomberohan nga kanunayng i-check ang electric wirings sulod sa panimalay pinaagi sa licensed electrician aron nga malikayan ang sunog.
RadyoMaN Kirby Manzon
