General Santos City—sikop sa operatiba sa Regional Drug Enforcement Unit (RDEU) sa pagpanguna ni Police Supt. Maximo Sebastian ang duha ka mga babaye nga gikaingong lambigit sa iligal nga druga atol sa gilusad nga buybust Operation sa may Prk. Veterans, Barangay Calumpang, General Santos City.
Mga suspek giilang silang si Ailine Ralia, 28; ug Cherry Amor Gubalani, legal age, pulos residenti sa Prk. Fernandez, Barangay Calumpang.
Alas 8:00 pasado ang takna sa gabie, dihang gihimo ang buybust operation batok sa duha ka suspek nga miresulta sa pagkasikop sa mga nahisgutan human sila napalitan ug gituohang shabu sa pulis nga nagpakarong-ingnong poseur buyer.
Wala na mipalag ang duruha human nga nahuptan sa tropa sa RDEU ang ebidensya gikan sa ilang posisyon.
Nakuha sa posisyon sa duruha ang (17) ka medium sized sachet sa gituohang shabu nga gibana-banaang mobalor ug P472, 000.00.
Sa kasamtangan anaa na sa silda sa Tambler Police Station ang duruha samtang ginaandam na usab ang kasong paglapas sa sec. 5 ug sec. 11 ilawom sa RA 9165 (Comprehensive Dangerous Drug Act of 2002) nga ipasang-at sa duha ka mga babaye.
