Tagum City – Mag-atubang og kasong kalapasan sa Republic Act 9165 o ang Comprehensive Dangerous Drugs Act of 2002, ang 12 ka mga indibidwal nga nadakpan atol sa pagronda sa duha ka drug den sa Purok 7, Tarubang, Lower Apokon, Barangay Apokon, Tagum City, Davao del Norte niadtong Biyernes (Mayo 21, 2021).
Sa hiniusang pwersa sa Philippine Drug Enforcement Agency (PDEA-XI), Davao del Norte Police Provincial Office ug Tagum City PNP, malampusong na-dismantle ang duha ka drug den sa lugar diin moabot sa 984,000 kantidad sa iligal nga droga ang nakuha sa awtoridad.
Subject sa search warrants mao sila Redin Tipas, Geralde Macopa, Randy Lumanta ug Rodel Morito, diin nakuha sa nahisgutan ang anaa sa 51.6 grams sa gituohang shabu, drug paraphernalia ug walo ka .38 revolvers isip kalapasan usab sa Comprehensive Firearms and Ammunition Regulation Act of 2013.
Sikop usab ang gituohang drug den visitors nga sila Rene Sagnay, Arnold Lagunsay, Rayman Capitan ug Dandy Lumanta nga anaa sa pinuy-anan ni Randy Lumanta. Samtang laing upat nga sila Ruel Ampong, Nur Maito, Sandrix Salasa ug Edmund Subido nga anaa sa panimalay ni Rodel Morito.
Target usab sa search warrant sila Benzar Ampong ug Anthony Dulay apan dali kining naka-ikyas human nakamatikod nga usa ka anti-drug operation ang gipahigayon.
Panawagan sa PDEA sa publiko nga tabangan ang gobyerno sa pagkab-ot sa drug free Philippines pinaagi sa pag-report sa mga indibidwal nga nalambigit sa illegal drug activities.
RadyoMaN Kirby Manzon
