Bukidnon – Ipahigayon sa Technical Education and Skills Development Authority (TESDA) ang duha ka adlaw nga National TVET Enrolment ug Jobs Bridging Day alang sa mga gustong makabansay-bansay sa technical and vocational education and training (TVET) ug sa mga graduates niini.
Ang mao nga kalihukan sa TESDA uban sa pakigtinabangay sa Bukidnon TVET Institution Association (BUKTIA) nga himoon karong Pebrero 27 ug 28 ning tuiga sa Valencia City Hall Covered Court, dakbayan sa Valencia.
Ang National TVET Enrolment with Jobs Bridging Day usa sa nag-unang kalihukan sa TESDA aron ma-promote ang TVET isip nag-unang opsyon sa trabaho.
Gi-aghat usab niini ang mga out-of school youth nga pahimuslan ang scholarship nga programa nga gitanyag sa TESDA alang sa tuig 2018.
Mag-imbita usab kini sa mga kaabag nga mga negosyante, employers ug industriya aron mu-apil sa jobs fair.
Gitandog sa TESDA-Bukidnon ang publiko nga gustong makabansay-bansay sa mga gitanyag nga kursong vocational sa TESDA nga mu-apil ug magpalista sa himoon nga 2 ka adlaw nga National TVET Enrolment aron makabaton sa igo nga suplay sa mga maayong technicians, technologists ug trabahante ang nasud.
