Nagpagawas ug duha ka kamanduan ang Provincial Government of Bukidnon aron mas mapahugtan pa ang pagbantay nga dili makasulod sa African Swine Fever sa lalawigan.
Sa interview sa RMN ngadto kang Provincial Administrator Atty. Jay Albarece, gibutyag niini nga pinasikad sa Executive Order No. 12, Series of 2021 nga nagmando sa Provincial Veterinary Office (PVO), lakip sa City/Municipal Veterinary and Agriculture Offices, ug barangay officials sa pagpahigayon sa mapadayonon nga surveillance sa mga binuhing baboy ingon man sa mga produkto sa karneng baboy alang sa sayo nga detection sa ASF sa ilang tag-tagsa ka mga area of responsibility.
Ingon man ang Executive Order No. 11, Series of 2021 pinitsahan Pebrero 19, 2021 ni Governor Zubiri, gihingusgan ang istriktong pagkontrol sa operasyon sa viajeros o live hog and pork products traders sa lalawigan.
Subay sa EO No. 11, Section 1 – gipakanaug sa Gobernador ang tahas ngadto sa City/Municipal Veterinarians and Agriculturists sulod sa Bukidnon nga kinahanglang ipasabot sa viajeros ang 1-7-10 protocol [.5 km radius quarantine area; 7-km radius surveillance area; ug 10-km control area gikan sa posebling apektadong barangay o purok] nga gilatid diha sa Administrative Order No. 22, Series of 2020 ayha maghatag sa certificate of registration; Section 2 – ang tanang viajeros o local live hog traders kinahanglang motuman ug magparehistro diha sa City/Municipal Veterinary Office ayha sila maka-apil sa pagpamaligya ug pagpalit sa buhing baboy; Section 3 – obligasyon o responsibilidad sa mga viajeros nga sundon ang disinfection protocol diha sa PVSC stations.
Matud ni Atty. Albarece nga ang mao nga kamanduan aron malikayan ang nahitabo sa Cagayan de Oro nga gipangbiyahe gilayon ang mga buhing baboy palayo sa barangay nga adunay presensya sa ASF aron dili ma-apil sa culling.
