General Santos City—upat ang angol sa duha ka sunod sunod nga disgrasya sa dalan sa managlahing lugar dinhi sa Gensan.
Unang nadala sa Dr. Jorge Royeca Hospital silang si Joila Kadji, 23; ug Joan Kadji, 19, pulos residenti sa Barangay Maan, Tboli, South Cotabato alas 9:40 ang takna sa buntag kagahapong adlawa sa Diversion Road, Barangay Sinawal, Gensan.
Subay sa report, sakay ang mga biktima sa ilang motorsiklo pag-uturn sa mga nasangpit sila nabanggaan ug taxi mao nga nabalintong ang gisakyang motor.
Nakaangkon ug mga gasgas sa lawas ang mga biktima kansa daling gidala sa ospital human sa insidenti.
Sunod nga nadala sa Dr. Jorge Royeca Hospital ang mga biktimang si Ferdinand Arisgado, 35, residenti sa Barangay San Isidro Gensan ug Christopher Arisgado, 33, residenti sa Klinan 5, Barangay Mabuhay.
Basi sa natala sa ospital samtang nagdagan ang motorsiklong gisakyan sa mga biktima, kalit miliko ang jeep nga ilang gisundan mao nga sila nabangga. Nakaangkon ug mga gasgas sa lawas ang mga nasangpit kansa gilayon nga gidala sa ospital.
Sa karon parehong nagpaalim nalang sa ilang mga samad nga naangkon ang mga biktima.
