2 ka mga estudyante patay, matapos malunod sa Lake Sebu, South Cotabato.

Wala na sang kabuhi sang marekober ang duha ka mga kabataan matapos nga malunod sa creek sa Sitio Lemote, Barangay Lamlahak, Lake Sebu, South Cotabato pasado alas 4 sang hapon kahapon nga adlaw, Enero 24, 2018.
Suno kay Lake Sebu MDRRM Action Officer Roberto Bagong, yara sa edad nga 8 kag 9-anyos ang mga biktima kag lunsay mga babaye nga ang isa ang magaselebrar pa sang iya nga birthday subong nga adlaw.
Ang nasambit nga mga kabataan ang nagaagi sa nasambit nga creek pakadto sa ila nga eskwelahan kag papauli sa ila nga puluy-an gamit ang tulay nga kawayan.
Apang sa ila nga pagpangusisa suno kay Sir Bagong nga nanaug sa suba ang nasambit nga mga biktima kabangdanan sang pagkalunod sang mga ini tungod sa makusog nga current sang tubig.
Ginkumpirmar man ni Bagong nga gilayon man sila nga nagpatigayon sang retrieval operation sang nabaton ang report alas 4:48 kag una nga narekober ang bangkay sang isa ka bata kag pasado alas 6:20 naman subong nga aga nakabaton siya sang report nga narekober na ang bangkay sang isa pa ka biktima.