Nadakpan ang duha ka katapo sang EPOGON ROBBERY-HOLD UP kag GUN FOR HIRE GROUP sa Sitio Kinalipay, Barangay Guilungan, banwa sang Cauayan sadtung sabado sang udto.
Ang mga suspek amo sanday Gerald Batoy, 32 anyus, residente sang syudad sang Himamaylan kag Eduard Acopan, 34 anyus, residente naman sang banwa sang Hinigaran.
Si Batoy ang BPAT member sa Himamaylan City samtang si Acopan ang empleyado sang banwa sang Hinigaran.
Na-dakpan ang duha ka suspek sa ginpatigayon nga operasyon sang kapulisan sa diin magapadulong sila kuntani sa banwa sang Cauayan para sudlon ang balay sang ka negosyante sa amo nga banwa.
Apang, natiktikan sila sang intel operatives sang pulis kag na-sundan sanday Acopan kag Batoy matapos nga nag-sakay sa dempasahero nga salakyan halin sa syudad sang Kabankalan.
Pag-abot sang duha sa Cauayan, didto na kag gina-dakup sila sang operatiba sa diin nakuha sa ila posisyon ang 2 ka kalibre 45 nga armas, isa ka granada kag mga bala.
Samtang, na-recover man sang otoridad ang cellphones sang mga suspek sa diin ila gina-contact ang ila mga kaupdanan nga kuntani maga-operate sa isa ka negosyante sa Cauayan.
Nahibalu-an nga Acopan ang naghalin na sa New Bilibid Prison sa kaso ma nga pagpangawat.
