Patay ang duha ka mga miyembro sa New Peoples Army kon NPA ug usa ka sundalo sa nahitabong engkwentro tali sa mao nga grupo ug 1st Special Forces Battalion sa Barangay San Rafael, lungsod sa Talakag, niadtong adlaw nga Sabado.
Sa interview sa RMN DXMB Malaybalay ngadto kang BGen. Ferdinand Barandon, ang commander sa 403rd Infantry Brigade, Philippine Army gibutyag niini nga na-engkwentro sa kasundaluhan ang hiniusang puwersa sa SRC4 ug SRC 5 sa NPA nga gibana-banang anaa sa 60 kapin kon kulang ka mga miyembro.
Nagresulta matud pa kini sa pagka-patay sa 2 ka patay nga lawas sa NPA, ug narekober usab sa kasundaluhan ang 5 ka mga armas nga gilangkuban sa 4 ka M16 ug 1 ka AK-47, 3 ka improvised explosive device, magazines ug mga paraphernalia sa walhong pundok.
Sa pagkakaron, wala pa nailhan ang 2 ka patay nga lawas sa NPA ug gi-turn-over na sa local government unit aron mailhan kung kinsa kini.
Gikasubo usab ni Gen. Barandon nga adunay 1 nga namatay sa habig sa kasdundaluhan ug 1 ang nasamdan.
Nasayran nga gigamitan sa AFP ug air asset ang mga ka-away.
Sa karon, balik normal na matud pa ang sitwasyon sa mao nga dapit.
