South Cotabato — Balhog na karon sa silda sa Koronadal City Police Office ang duha ka mga tawong mikawat matud pa sa aboloy sa patay sa may Southern Funeral Homes, General Santos Drive, Koronadal City.
Giila ang mga suspek nga silang si Richard Navarro, 34 anyos, security guard ug residente sa Barangay Caloocan, Koronadal City ug Bienvinido De Pedro, 31 anyos ug residente sa Barangay Zone 1, Koronadal.
Sumala sa usa ka Leonavil Gaston, 26, gihaya ang iyang inahan sa maong punerarya, samtang sya nangape aduna matud pa usa ka lalaki nga miduol sa donation box. Kalit matud pa kining gikuha sa suspek dayon lakaw, samtang ang usa ka suspek ang nagsilbi matud pa nga lookout sa gihimong pagpangawat.
Wala usab nakalingkawas ang mga suspek human gidakop dihang namatikdan gilayon sa reklamante ang ilang gihimong pagpangawat. Gilayon usab silang gi-turnover ngadto sa kapulisan.
