General Santos City—Nag himo na ug makuting imbistigasyon ang Malungon PNP kalabutan sa pagpanunggab patay ug nanigbas sa wala pa mailhing suspetsado sa duha ka mga biktimang taga Gensan sa area sa Sitio Carillo, Barangay Malabod, Malungon, Sarangani Province.
Giila ang biktimang namatay nga si Mark Balsita, 27, residenti sa Zone 9, Barangay Bula, Gensan. Samtang giila ang biktimang naangol nga si John Paul Toribio, residenti sa Barangay Lagao.
Sa inisyal nga imbistigasyon sa Malungon PNP nasayran nga sakay ang duha ka mga biktima sa motorsiklo pauli na sa Gensan apan pag abot sa kurbada nga bahin sa Barangay Malabod, giharang sila sa wala mailhing suspek.
Unang gidunggab ang biktimang si Balsita, igo sa nagkandaiyang parti sa lawas nga hinungdan sa iyang kamatayon. Sunod nga gipahimungtan ang back rider nga si Toribio diin kini gitigbas igo sa iyang lawas. Nakadagan hinuon ang biktima ug nakapangayo ug tabang sa mga residenti sa lugar maong wala kini mapuruhan.
Sa karon wala pay natumbok nga suspek ang kapulisan apan padayon pa ang ilang ginahimong imbistigasyon kalabutan sa maong insidenti.
