General Santos City—Patay sa gihimong search warrant operation sa tropa sa Police Station, uban ang uban pang unit sa kapulisan ang duha ka target sa maong operasyon nga silang si Leo Canumay, legal age, ug Christoper Wes, legal age, residente sa Phase 5, Barangay Mabuhay, Gensan alas 12:50 ang takna sa tungang gabie.
Sa inisyal nga impormasyon nga nahipos sa RMN Gensan News Team, gisulod sa kapulisan ang balay sa mga nasampit human nga nakadawat sila ug impormasyon nga naghupot ang duruha ug dili lesensyadong armas.
Bitbit sa kapulisan ang search warrant batok sa duruha apan dihang gihimo na ang operasyon, misukol matud pa ang mga suspek mao nga napugos matud pa ang kapulisan nga mobalos nga hinungdan sa kamatayon sa duruha.
Samtang gihingusgan usab sa kabanay ni Wes ugCanumay nga wala misukol ang mga nahisgutan.
Human matud pa nga gisulod sa kapulisan ang panimalay sa mga nasampit silang mga kabanay ang gipagawas sa otoridad. Natingala nalang sila human sa pipila ka minutos, nakadungog nalang sila ug buto sa pusil ug didto nasayran nalang nila nga samdan ang duruha.
Gidala pa sa kapulisan sa ospital ang duruha apan gideklarang dead on arrival.
Gihingusgan pa sa pamilya nga wala misukol ang mga nasampit. Unsaon nila pagsukol tungod sa kadaghan sa kapulisan niadtong higayuna, gawas niana ila pang nakit-an nga gipahapa ang mga nasampit ug gani gitamakan na sa kapulisan likod pasabot nga dili na gyud makapalag pa ang duruha.
Nasayran nga igo nalang sa pagdangoyngoy ang anak ug ang asawa sa duruha dihang nakit-an ang patayng lawas sa mga nahisgutan.
