Gi-dismiss sa Ombudsman ang duha ka mga pulis nga sakop sa Kitcharao Municipal Police Station, human nakitaan ug probable cause ang kasong homicide ug grave misconduct nga gipasaka batok kanila subay sa palpak nga drug buy bust operation nga gikamatay sa naala-an lamang nga biktima’ng adunay depirinsya sa pangisip.
Giila ang duha ka mga pulis nga sila si PO2 Daryle Alonzo ug PO2 Larry Precioso. Sa resolusyon nga gipagawas sa Ombudsman, gawas sa dismissal sa serbisyo, ipatuman usab ang kanselasyon sa eligibility, forfeiture sa retirement benefits ug perpetual disqualification to hold public office.
Nagsumikad ang maong kaso sa dihang midangop sa National Bureau of Investigation (NBI) si Marlou Melecion, ang igsoon sa napatay nga si Expedito Melencion, aron imbistigahan ang giingung buy bust operation.
Nigawas sa imbistigasyon nga niadtong Oktubre 18, 2016, bandang alas 5:30 sa hapon samtang nagsakay sa single motor ang biktima kalit lang kini gipusil sa duha ka mga pulis. Aron ma-justify ang pagpusil, gihulog nga matud pa usa kadto ka lehetimong buy bust operation ug gikatahung misukol ang biktima.
Nakuha sa posisyon sa patay’ng lawas sa biktima ang 3 ka sachet sa shabu ug usa ka pistola apan gibarugan sa pamilya sa biktima nga “planted” ang ebidensya. Nasayran nga “mistaken identity” lamang ang biktima nga si Expedito kay ang tinoud nga target sa operasyon mao ang nailang alyas “longhair” ug nigawas usab nga negatibo sa paraffin test ang biktima.
Tungod niini kombinsido ang Ombudsman nga adunay probable cause ang kasong homicide ug grave misconduct batok sa duha ka mga pulis.
Subay niini gibutyag ni PI Antonio Cayasa, hepe sa Kitcharao Municipal Police Station nga hingpit nang gipatuman ang dismissal batok sa duha ka mga Pulis.
Sent from my Samsung Galaxy smartphone.
