General Santos City—Patay ang duha ka mga suspetsado nga responsible sa basag Kotse dinhi sa dakbayan sa Gensan human nakigpinusilay sa kapulisan alas 11:40 ang takna sa gabie.
Giila ang mga suspek nga silang Josefino Emperado ug Jan Eric Jaud nga pulos taga Gensan.
Sa inisyal nga report sa Police Station 3 nasuta nga nag patrolya ang kapulisan gumikan na usab sa sunod sunod nga kaso sa basag kotse nga natigayon sa Area of Responsibility sa Police Station 3.
Pag abot sa Ventilacion street, brgy. Lagao, naaktuhan sa kapulisan nga ginabuak sa suspek nga si Emperado ang sakyanan nga iyaha ni Harold Burgos nga nakaparking lang sa lugar, dihang nakamatikod sa presensya sa kapulisan, paspas nga misibat ang mga suspek sakay sa ilang sakyanan nga usa ka mazda, color blue nga dunay plate no. WEC 414 hinungdan nga gigukod sila sa kapulisan.
Pag-abot sa Amado Fenequito street, brgy. Lagao, gipabuthan sa mga suspek ang kapulisan mao nga nibalos ang awtoridad nga miresulta sa pagkaigo sa mga suspek nga hinungdan sa ilang kamatayon.
Narekober sa posisyon sa mga suspek ang usa ka unit sa caliber .45 ug .38 revolver.
Sa karon nagpadayon pa ang imbistigasyon sa kapulisan kalabutan sa maong insidenti.
