2- miyembro sa MNLF, dakpan; ubay-ubay nga armas ug granda, narekober

95

General Santos—Dakpan sa gipahigayong search warrant operation sa Criminal Investigation and Detection Group 12 ang duha ka mga miyembro sa Moro National Liberation Front (MNLF).

Sumala kang Police Superintendent Felix Servita, ang labaw sa maong buhatan nga duha ka mga search warrant ang ilahang gi-serve sa may Brgy. mabuhay ning dakbayan human silang nakadawat ug impormasyon gikan sa mga residente nga adunay presensya sa armadong grupo sa lugar.

Rason nga nagpahigayon sila ug operasyon uban ang RIU, GSCPO, RPSB 12, ug uban pang support unit sa kapulisan.
Giila niini ang duha ka mga suspek nga silang Malou Banayo ug Mario Emlayi. Wala matud sa lugar ang target sa operasyon nga si Kumander Midzpar nga kaipon ni Banayo.


Narekober gikan sa panimalay sa sa mga suspek ang usa ka hand grenade, 9mm machine pistol, usa ka riffle, managlahing buhing bala, mga magazine ug usa ka cellophane sa gituohang marijuana.
Apil nga narekober ang ubay-ubay nga mga camouflage nga mga uniform ug flag sa MNLF.

Dugang pagbutyag ni Supt. Servita nga basi sa ilahang impormasyon, usa na katuig nga nagpuyo ang mga nahisgutan sa maong lugar ug naalarma na matud pa ang mga residente gumikan nagapakita ug armas ang mga nahisgutan higayon nga mugawas sa ilahang compound.

Gipaklaro usab niini nga gilayon silang nagpahigayon ug aksyon gumikan dili nila buot mahimong taguanan sa mga teroristang grupo nga misibat sa marawi ang maong lugar.



Sa kasamtangan, ginahikay na ang tukmang kaso batok sa sa duha ka mga suspek samtang padayon pang gipangita ang kaubanan nila nga nakasibat. (LORE MAE V. ROMUALDO)

Facebook Comments