General Santos City–Kasong robbery Extortion ang gipasang-at nga kaso sa Alabel Muncipal Police Station ngadto sa duha ka miyambro matud pa sa NPA nga una nang nasikop sa kapulisan inabagan sa 73rd Infantry Battalion sa National Highway nga sakop sa Barangay Ladol, Alabel, Sarangani Province.
Giila ang mga suspek nga silang si Ailen Walan, 35, residenti sa Barangay Kihan, Malapatan ug Jenetor Go, 27, residenti sa Sapu, Masla, Malapatan, Sarangani Province. Pulos miyembro sa Guerilla Front 71 , Far South Mindanao Region.
Sumala ni Police Sr. Inspector Benjie Ancheta, hepe sa Alabel PNP nga Nasikop ang duruha atol sa gihimong entrapment operation human nilang gipangayuan ug kwarta nga P20,000.00 ang usa ka negusyante nga taga Jose Abad Santos Davao Occidental.
Nakig-alayon usab ang militar ngadto sa buhatan sa Alabel Municipal Police Station kansa maoy nanguna sa gihimong operasyon. Sakay matud pa nag duha ka mga suspek sa sikad nga gipanihuan ni Go. Sakto pagdawat nila sa P20,000.00 pesos nga kwarta gikan sa negusyante didto na sila gisikop.
