TACLOBAN CITY – Nagdumara hin Oplan Galugad ngan buy-bust operation an Samar Police Provincial Office, 1st Samar Provincial Mobile Force Company ngan Philippine Drug Enforcement Agency (PDEA) ha Sub-Provincial Jail ha Calbayog City, Samar, alas 8:00 han gab-i, kagab-i.
Basi ha report han Samar PNP, ginkilala an mga suspek nga hira Melencio Dulman Diaz, 45 anyos, may asawa; Johnny Tibo, 41 anyos ngan Remigio Cabredo, 42 anyos, asawa han usa nga councilor ha Samar ngan mga preso ha nasabi nga presuhan.
Arestado gihapon han mga otoridad an mga jail guard nga ginkilala nga hira Vivencion Elbano, 49 anyos, may asawa ngan hi Ronnel Salomon, 39 anyos, may asawa.
Narikober tikang ha mga suspek an 11 kapakete han heat sealed transparent plastic sachet han gin-aaligar shabu, buy-bust marked money nga P10,000, 11 nga cellphone, usa nga caliber .45 nga pusil nga may sulod nga 9 nga bala, ngan usa nga improvised glass toother.
Ha press conference, sumala kan Samar PNP Provincial Director PSSupt. Nicholas Torre, gin-updan pa han mga jail guards an mga preso pagbaligya hin droga ngadto ha mga pulis nga nag-ala poseur buyer.
“We are able to get an informant who gave us the details of who can be transacted from inside the jail. Ang poseur buyer natin ang nakabili ng worth P10,000 na shabu from the detainee who went out of the gate escorted by a jail officer and monitored by another jail guard.”
Nakabalik pa ha jail facility an mga suspek pero nakahibaro hira nga mga pulis an ira nakatransaksyon ngan didto na umaksyon an mga kapulisan pagsakob ha nasabi nga presuhan.
Pwersahan nga gin-abrihan han mga otoridad an gate ngan naaresto an mga involved han buy-bust operation.
Basi ha source, an preso nga hi Remegio Cabredo in asawa ni Incumbent San Jorge Councilor Mertell Cabredo nga pumirma nga ig-persona non grata hi PSSupt. Torre ha probinsya han Samar.
Gintutuuhan han mga otoridad nga maiha na nga may presensya hin illegal nga droga ha Sub-Provincial Jail han Samar.
Ira na ginpapanginano kun dabi ba ha mga transaksyon an mga opisyal han jail facility pero papasakahan hin administratibo nga kaso ini nga mga opisyal tungod han pagpapabaya ngan may nakakasulod-gawas nga mga preso nga nagbabaligya hin droga.
“Sigurado yan na lahat ng mga nandoon ngayon na incumbent ay ubos yan at matatanggal sa administratibo yan because they have been negligence specially the Warden.” – PSSupt. Torre
An mga jail guard in papasakahan hin kaso nga conspiracy han RA. 9165 samtanga an mga drug suspect in papasakahan hin kaso nga sale ngan possession of illegal drugs.
Ha pagka yana, aada na ha kustodiya han Samar PNP an mga suspek.
