TACLOBAN CITY – Duha nga patay nga lawas an gintutuohan nga mga taga Lapu-Lapu, City an natad-an ha kabaybayon han Sitio Cabatuan Brgy. Tinag-an Albuera Leyte kanina han aga, Oktobre 21, 2017.
Ginkilala an mga biktima nga hira Helen Gingco, 25 anyos ngan Jenny Rose Tormon, 29 anyos.
Sumala kan PInsp. Alexander Alfonso, Chief of Police han Albuera Municipal Police Station, an duha nga biktima in nai-report nga missing ha Lapu-Lapu City dida han Oktobre 15, 2017, usa na ka semana an nakalabay matapos manguha ini hira hin mga shellfish ngan tigda nala daw nawara matapos humangin hin makusog ngan umaran kun diin didto na hira gin-anod han kadagatan.
“May nai-blotter sa Lapu-lapu City patungkol sa nawawalang dalawang babae at yun na yung pinaniniwalaan namin which is yung nakita naming patay na katawan dito sa Albuera.”
Dugang pa ni PInsp. Alfonso, mahitungod nga usa na ini ka semana nga nawawara, in diri na makilal-an ngan naaagnas na an lawas han duha nga biktima. An mga sul-ot nala daw an magpapamatuod han ira pagkakakilal-an.
“Naaagnas na po yung dalawang katawan at tanging damit na lang ang pagkakakilanlan ng dalawa.”
An usa nga biktima in nakasul-ot nala hin bra ngan shorts ngan an usa naman in nakasul-ot hin black nga t-shirt nga may nakaimprenta nga I Love Cebu.
Segun kan PInsp. Alfonso, nga nakipagsumpayan na ha ira an asawa han usa nga biktima ngan nakatalaan nga pumakadto ha Albuera, Leyte agud makompirma kun iya ba gud adto asawa.
Ha pagkayana in namumutang an duha nga patay nga lawas ha punerarya ha Albuera, Leyte.
