Davao City – Nibalik sa sabakan sa gobyerno ang duha ka mga NPA leaders didto sa Sta. Cruz, Davao del Sur niadtong Huwebes sa hapon.
Giila ang mga kanhi NPA leaders nga sila Alvie Marie Salvaleon Cominador aka Ara Secretary sa Guerrilla Front 51 sa Southern Mindanao Regional Command (SMRC) ug Shane Rosete Cacdac aka Neo staff officer sa Sub-Regional Command (SRC) sa New People’s Army.
Nidesisyon si Cominador nga itahan ang iyang kaugalingon sa mga kasundaluhan tungod sa iyang kamingaw sa iyang pamilya ug mga anak kay dili dayon siya makauli tungod kay anaa siya sa kalihukan.
Matud niini gikapoy na usab siya sa pagtago-tago sa kabukiran karon nga sagunson ang operasyon sa militar.
Ang duha ka mga NPA leaders nga nisurrender gipresentar na sa LGU sa Davao del Sur aron matagaan sila’g hinanaling ayuda ubos sa CLIP (Comprehensive Local Integration Program).
Nanawagan si 1002nd Brigade Commander Colonel Roberto Ancan ngadto sa mga nahibilin pang mga membro sa NPA nga padayon gihapin sa pagtago-tago sa kabukiran nga isurrender na ang ilang mga kaugalingon, mga armas ug dawaton ang suporta gikan sa gobyerno alang kanila.
RadyoMaN Aimee Guinita
