*Dos miembros del Philippine Air Force quien alegaomente maga hechor quien ya ruba dos maga motorsiclo na Tumaga Porcentro y na Lunzuran del mas reciente.*
*Banda alas 3:15 del tarde maga pulis ya tene entabla na pantalan particular na un lancha ta biaja para na Basilan despues resivi informacion tiene dos maga motorsiclo muntao y dudable.*
*Cuando ya llega el maga pulis del Station 11 na lancha, dos maga motorsiclo, Honda Beat110Fi y un Yamaha MIO ya puede estos columbra donde todol dos sin placca.*
*Na mismo tiempo dos maga persona nombrao como canda Jomar Anggao Natividad de Malarang, San Jose, Lamitan y si Adhar Jamalul Iklamo, de Maloong, Lamitan ya habla con el maga pulis que sila el quien ta lleva con el dos motorsiclo.*
*Asegun el dos persona presenta maga Xerox del registration del dos motorsiclo donde ta indica na nombre di canda Tiffany Kaye Liong como dueño del Honda Beat 110Fi que sale rubao del Febrero 22 banda alas 8:15 del noche mientras el tro Xerox del registration del Yamaha MIO ta dueña si Helen M. Sulas di quien motorsiclo porsaomente ya ruba el dos armao persona na Lunzuran banda alas 8:45 del mismo noche.*
*Canda Natividad y Iklamo ya habla con el maga pulis que el dos motorsiclo ya bende canila canda Sgt. *Arjin Jamalul Anualla 35, y Nelson Dulaca Villanueva, ambos maga miembro del Phillipine Air Force assigned na Edwin Andrews Air Base.
El combinao fuersa del Central Police Station, Divisoria Police Station in Sta. Maria Police Station ya conduci el follow-up operation na EAAB ya resulta el aresto del dos air force.
Ta aparese el dos soldao amo el quien ta ruba maga motorsiclo con el maga mojer quien ta maneja motor durante el noche na AOR del Sta. Maria Police Station y Divisoria Police Station.
