Sa interbyu sa DXDC RMN Davao kang Engineer Allen Baco, head sa Operations and Warning Division sa PDRRMO – Davao de Oro, gibutyag niini nga duha ka 65 ug 67 anyos nga mga lalaki ang nalumos sa baha gikan sa Compostela, Davao de Oro. Samtang usa ka 64 anyos nga babae gikan Monkayo ang nagpabiling
missing hangtud ning pagsibya o pagsuwat ning balita.
Matud ni Bacon nga dul-an 5,000 ka pamilya ang apektado sa kalamidad sa Davao de Oro diin anaa na usab karon ilawom sa State of Calamity ang probinsya.
“Ang mga evacuees nakauli na sa ilang mga panimalay. Total affected, sa families 4,606 unya sa individuals is 9,631,” butyag ni Baco.
Sa pinakaulahing datus sa National Disaster Risk Reduction and Management Council (NDRRMC), anaa sa 136,390 katao o 86,515 ka pamilya ang apektado ni Agaton sa 201 barangays sa Western Visayas, Central Visayas, Eastern Visayas, Northern Mindanao, Davao Region, Soccsksargen, Caraga, ug Bangsamoro.
Anaa sa 52 ka balay ang nadamyos diin 49 niini partially damaged ug 3 ang totally damaged sa Central Visayas, Northern Mindanao, ug Caraga.
RadyoMaN Kirby Manzon
