Duha ang patay samtang 20 ang samdan atol sa nahitabong pagka-aksidente sa RTMI Aircon mini bus sa Sitio Bago, Impalutao, Impasug-ong kaniadtong Sabado sa hapon.
Sa interview sa RMN Malaybalay ngadto kang Police Captain Joseph Yabo, ang hepe sa Impasug-ong Municipal Police Station gibutyag niini nga base sa ilang imbestigasyon adunay gisundan ang mao nga bus apan kalit lang ug break tungod sa kadanlog sa dalan mugna sa ulan.
Sa kalit nga pagbreak maoy hinungdan nga natumba ang mao nga bus.
Matud ni Capt. Yabo nga adunay 38 ka sakay sa mao nga bus apil ang driver ug conductor.
Gi-ila sa hepe ang duha nga mga pasahero nga namatay nga sila si Marisol Marinay nga taga Poblacion, Impasug-ong ug Maryjoy Tubay nga taga Cawayan, Impasug-ong.
Samtang ang 20 ka mga nasamdan ang dali nga gidala balay tambalanan sa Bukidnon ug Cagayan de Oro City.
Samtang detinado usab ang driver sa bus sa Impasug-ong – PNP.
Gisiguro usab daw sa RTMI bus ang tabang ngadto sa mga pasahero nga nasamdan ug pamilya sa mga namatay.
Ang mao nga bus paingon unta sa siyudad sa Cagayan de Oro.
