General Santos City–Duha ang patay samtang tulo ang angol sa hitabong disgrasya sa dalan sa Brgy Calumpang ning syudad sa Gensan kagahapon sa kaadlawon.
Sumala ni PO2 Lemuel Abis- imbestigador sa Traffic Management Unit, ang aksidente gikalambigitan duha ka mga motorsiklo ug usa ka four wheels nga sakyanan.
Nasayran nga dead on arrival sa ospital ang duha ka mga drayber sa motor samtang kritikal ang kahimtang sa duha ka mga angkas niini. Giila ni PO2 Abis ang mga namatay nga sila si Han Ivan Ezequel 21 anyos nga taga Brgy Mabuhay, Gensan ug si Guilbert Paulio taga Alabel, Sarangani kansa susamang drayber sa duha ka mga motorsiklo.
Kritikal usab ang ilang mga angkas nga sila si Jaybert Daug-daug 19 anyos nga taga Brgy Mabuhay Gensan ug Clemente Paulio 19 anyos nga taga Alabel. Nadala usab sa ospital ang drayber sa KIA nga si Randil Lumapaz 19 anyos nga taga Marikina City kansa nakahiagom ug mga bun-og ug samad sa ulo sa lawas.
Migawas sa pasiunang imbestigasyon sa Traffic Mangement Unit nga paingon sa sentrong bahin sa Gensan ang duha ka mga motorsiklo samtang padulong sa dalang fishport ang KIA.
Nagkasugat matud pa ang mga biktima sa may New Bohol Calumapang sa diin kalit nga miilog ug dalan ang KIA nga sakyanan hinungdan nga nagbangga. Kasamtangan pa nga nagpaabot ang kapulisan sa TMU unsa mang himuong legal nga aksyon sa mga pamilya sa mga biktima. (Jordan Britos)
