Patay ang duha ka mga suspek, matapos nga nagbato sa kapolisan sa ginpatigayon nga law enforcement operation sa Barangay Kablon, Tupi, South Cotabato, alas 5:40 sang hapon, kahapon nga adlaw, Oktubre 11, 2021. Ginpatigayon ang Law Enforcement operation matapos nga may nabaton nga report ang Tupi MPS halin sa concern citizen angot sa ginaaligar 2 ka makaduluda nga mga armado nga tawo sakay sa Motor Star motorcycle nga wala sang plate number sa atubang sang Tupi Fruit Park, Barangay Kablon, Tupi. May-angot sini, ang Tupi MPS sa koordinasyon sa Polomolok Municipal Police Station ang nag-istablisar sang chokepoint sa Barangay Crossing Palkan, Polomolok. Samtang sang ginsita sang responding team ang mga suspek gilayon ang mga ini nga nagpalagyo padulong sa banwa sang Polomolok kag pag-abot sa Sitio Basak, Barangay Polonuling, Tupi gintiro sang mga suspek ang nagalagas nga responding team kabangdanan nga nagbalos man ang kapolisan. Resulta nakaangkon sang gunshot wounds ang mga suspek nga gilayon man nga gindala sa ospital, apang gindeklarar nga patay samtang ginapaidalom sa medikasyon. Ginkilala ang mga suspek kanday Ron Ron Quimpo Villorente, 24 years old, single kag Tata Felex Villorente, 24 years old, single, kag pareho residente sang Purok 5, Barangay Simbo , Tupi, South Cotabato. Narekober naman sa lugar ang isa ka unit sang caliber 9mm CZ 75B Cal 9 Luger pistol, magazine nga may 10 ka mga bala, 1 ka unit sang magazine kargado sang 13 ka 9mm nga mga bala, 1 ka unit sang caliber .45 Colt 1911 with chamber load kag magazine nga may tatlo ka mga bala, 1 ka unit sang caliber .45 magazine nga may 15 ka mga bala, 9 ka basyo sang ginaaligar caliber 9mm, 1 ka basyo sang ginaaligar cal. 45, pula nga Motor Star motorcycle nga wala sang plate number, P3,528.00 , assorted identification cards kag iban pa. Sa subong suno kay PMAJ Rafael Banggay Jr., Acting Chief of Policesang Tupi MPS padayon ang ila nga imbestigasyon kon sa diin nga grupo konektado ang nasambit nga mga suspek. Ginkumpirmar man ni PMAJ Banggay nga nakuha na sang ila nga pamilya ang bangkay sang duha.
