Unom ka mga armas ug duha ka mga patayng lawas nga myiembro sa NPA ang narekober sa militar sa managlahing engkwentro nga natigayon sa combat military operation sa Gingoog City, Misamis Oriental ug Buenavista, Agusan del Norte gahapung adlawa December 14, 2021.
Unang engkwentro natigayon sa bukirang bahin sa Mangilit, Brgy Bal-ason, Gingoog City diin nasugatan sa tropa sa 58IB PA ang mga rebelde nga sakop sa GF Huawei and SRSDG Eagles, Sub-regional Committee 1 (SRC1) sa North Central Mindanao Regional Committee (NCMRC) alas 5:50 sa buntag ug milungtad sa 30 minutos ang bakbakan, nga miresulta sa pagkamatay sa 2 ka wala mailang myiembro sa NPA.
Samtang lakip nga narekober ang usa ka M16 Rifle, usa ka AR18 Rifle, 2 ka AK-47 Rifles ug usa ka M203 Grenade Launcher, mga subersibong dokumento, ug mga personal nga gamit sa mga NPA.
Ug pagka alas 7:15 sa buntag naengkwentro sa tropa sa , 23rd Infantry Battalion ang 5 ka mga myiembro sa NPA nga ubos sa SRSDG Sagay, NCMRC sa pagpanguna ni Jelan Pinakilid alias Baking sa Sitio Malague, Barangay Guinabsan, Buenavista, Agusan del Norte, sa higayon miabot sa 5 minutos ang sinukliay sa buto, hinungdan nga nasakmit sa militar ang usa ka M14 Rifle nga may (2) ka mga magazines.
Sa panahayag ni Major General Romeo S Branwer Jr, ang Commanding General sa Philippine Army ug kasamtangang Commander sa 4ID, nga ang managsunod nga kalampusan sa 23IB, 16IB ug 58IB, ang gumikan sa tabang usab sa impormasyon nga gitunol ni alias Omar Ibarra, ang Political Officer, Spokesperson ug Deputy Secretary sa SRC3 sa NCMRC sa NPA.
