2 patay sa pagbunggu-anay sang duha ka mga motorsiklo sa banwa sang Banga.

Duha ang tigayon nga nabawian sang kabuhi sa nagluntad nga disgrasya sa dalanon sa National Highway, Prk. Mahidaiton, Brgy. Liwanay, Banga, South Cotabato pasado alas 11 sang gab-i sang tinalikdan nga adlaw.
Ginkilala ang mga biktima kanday Rodney Vigot Dela Torres, 24-anyos, single, wala driver license, private employee kag residente sang Prk. 3, Surallah, South Cotabato nga nagamaneho sang motorsiklo nga Euro 125, color blue, bearing temporary 11010401478. Kag ang isa pa ka biktima ang ginkilala kay Arvin Cris Suyo Tañeza , 21-anyos,single, wala driver license kag residente sang Brgy. Veterans, T’Boli, South Cotabato nga nagamaneho sang motorsiklo nga STX 125 nga may plate no. KF 6571, color red nga ginapanag-iyahan ni John Togonon kag may angkas nga ginkilala kay Ronnie Diaz Duga, 26-anyos, single kag residente sang Prk. Mabuhay, Brgy. Benitez, Banga, South Cotabato.
Sa imbestigasyon sang mga kapulisan, halin si Rodney sa direksyon sang Koronadal kag padulong sa Surallah, samtang si Arvin ang yara sa opposite direction sang hinali na lang nga naglikaw si Arvin sa pihak nga lane kag hinali lang nga nagbangga-anay ang ila duha ka mga motorsiklo sa diin nakaangkon ang duha ka mga drayber kag isa ka angkas sang malala nga mga pilas sa nagkalain- lain nga parte sang ila lawas . Gilayon naman nga gindala ang mga biktima sa Upper Valley Hospital, Surallah, South Cotabato para sa nagakaigo nga medikasyon.Apang gindeklarar nga dead on arrival ang duha ka mga drayber tungod sa malala nga injury nga nangin rason sang ila kamatayon, samtang ang angkas naman nga si Ronnie ang padayon nga gapabulong sa nasambit nga hospital.
Sa subong, ang duha ka mga motorsiklo ang yara sa Banga MPS para sa nagakaigo nga disposasyon.