General Santos City–Malampusong nasikop sa mga personahe sa Police Station 8, ang duha ka mga tulak ug iligal nga droga sa ilahang gipahigayon nga buy-bust operation alas 9:30 ang takna sa gabie sa Diversion Road, Prk. 9, barangay Katangawan ning syudad.
Giila ni Police Captain Robert Fores, ang hepe sa Police Station 8, ang mga suspect nga silang Franco Durano alyas Franco, 34 anyos ug nanimuyo sa KPS, Barangay Labangal ug Rodgen Deiparine, alias Gen, 30 anyos, nga nanimuyuo sa Prk. New Bohol, Barangay Calumpang.
Matud ni Fores nga ang duruha maoy source sa droga sa dinakpan sa Police Station 2 niadtong milabay nga adlaw ug naga-operate sa tibuok syudad sa Gensan.
Nakuha sa posisyon sa mga suspect ang 4 ka mga sachet sa gikatahapang shabu nga gibana-banaang anaa sa 4 mil ka pesos ang kantidad, 500 pesos nga mark money ug ang sikad nga gigamit sa mga nasampit sa maong transaksyon.
Gikabutygan karon ni Capt. Fores nga sagad sa mga naga tulak sa droga karon ang naga gamit na ug mga dipampasaherong mga sakyanan aron sa pag pamaligya tungod kay bisan asa lang sila makaabot.
Giandam naman usab sa kapulisan ang kasong pagsupak sa RA 9165, Sec 5 ug 11 sa Article II (comprehensive dangerous drugs act of 2002) batok sa mga suspect. (Dave Silagan)
