General Santos City—padayon pang giila sa kapulisan nga sakop sa Police Station 2 ang duha ka ma suspetsadong gituohang miyembro sa Children in Conflict With The Law (CICL) nga responsabli sa gikaingong pagpanglugos ngadto sa 7 anyos nga batang babaye sa bagnutan nga bahin nga sakop sa Purok Balunto, Barangay Labangal.
Kahinumduman nga niaging adlaw, mireklamo sa Womens and Children Protection Desk (WCPD) ang apuhan sa 7 anyos nga itago lang sa pangalang Alias Angel human misumbong kaniya ang iyang apo nga matud pa siya gilugos sa duha ka mga suspetsado.
Una nang namaligya ug saging ang nasangpit nga bata duol sa eskwelahan sa Purok Balunto diin duha matud pa ka mga batan-on ang nipalit ug saging ngadto kaniya.
Siya gidala sa mga suspek human nga tua lang matud pa sa ilang balay bayran ang saging nga gikaon sa mga nahisgutan apan pag abot sa bagnutan nga bahin duol sa sapa didto na kini gilugos.
Sa karon dili pa maestorya ug tarong ang nasangpit nga biktima gumikan sa tumang kahadlok human sa gihimo kaniya sa mga suspek.
