Makato, Aklan – Patay rong sangka 20-anyos nga eaeaki matapos nga maeomos kahapon it agahon sa suba it Brgy. Calangcang, Makato, Aklan.
Ro biktima nakilaea kay Kim Jordan Fernandez ag residente man it nasambit nga lugar.
Suno kay PSMS Ariel Narral it Makato PNP nga base sa andang imbestigasyon ag sugid ko nanay it biktima nga si Jocelyn Fernandez nga kahapon it agahon mga alas 9:00 hay ginsugo na ro biktima nga usuyon ro andang ayam ay nakaguwa sa andang kurae.
Mga alas 11:00 rong agahon hay nakauli eon ro andang ayam pero ro biktima hay uwa pa pero uwa gid imaw magkahawag it mayad ay barkador man ro anang unga ag paeawarang una.
Bangud sa pag inusoy man ko mga tawo hay nagbulig lang man ro andang Chief Tanod nga si Jonathan Supetran, anang gin adtunan sa suba ag nakita na sa kilid it suba sa baeas ro tsenilas it biktima.
Ana pa gid nga gin-usoy ag nakita na ro eawas it biktima nga nagakueob sa may madaeom nga parte it suba.
Dali-adali nana nga ginpatakas ag gin aplayan it CPR bangud nga naka training man imaw kara pero uwa eon naga response, pag-abot it mga taga MDRRMO hay anda man gin CPR ag first aid hay uwa gid matabangi.
Natamaan man nga nag-agi sa lugar si Dr. Moises Lasolita sangka private doctor ag nagkangawa nga kon ham-an abong tawo, ginsugiran imaw nga may naeomos ag ana gid gin-atunan para i-check ro biktima ag ana nga gin deklara nga patay eon.
Nasayuran ko ulihi sa nanay it biktima nga raya gali hay may epilepsy ukon kueo nga ginapatihan basi imaw inatake samtang sa tubi.
