Davao City – Mokabat sa 20 ka mga gambalay ang gideklarang dili na safe kun luwas alang sa mga okupante niini human gipahigayon ang makuting pagsusi sa mga building authorities sa dakbayan.
Sumala ni Atty. Dominic Felizarta sa City Engineer’s Office, kabahin kini sa 200 ka mga gambalay o buildings sa syudad nga ilang gipailawom sa thorough inspection sukad niadtong November 11 human sa sunod-sunod nga linog nga nasinatian sa atong syudad ug kasikbit nga mga dapit.
Giklaro ni Felizarta nga hinanaling pag-repair lamang ang gikinahanglan ug dili deretsang demolisyon sa nahisgotang mga defective buildings.
Gitataw ni Felizarta nga tubagon sa lokal nga panggamhanan ang gasto sa pagpaayo sa mga buildings nga gipondohan sa budget sa syudad.
Sa pikas bahin, giklaro ni Engr. Grace Catubig sa Office of the City Building Official (OCBO) nga sukad niadtong November 15, mikabat na sa 52 ka mga pribadong buildings ang ilang na-inspection.
Matud ni Catubig , walo niini kasagaran mga private condominiums gipadal-an na nila og Advice or Notice to Vacate aron malusad sa property owners ang gikinahanglan nga required repair kun retrofitting.
RadyoMaN Bernard Pantallon
