Nagalab-ot sa 200 tubtob 300 ka ektarya sang mga pananom nga yara sa vegetative stage ang naigo sang pagbaha ukon indi na mapuslan sa dose ka mga barangay sa banwa sang Banga nga malapit sa Banga River.
Samtang yara naman 20-25 ka ektarya sang fishpond ang apektado sang pagbaha sa Brgy. El Nonok nga may pinakadaku nga aquafarm, apektado man ang fishpond sa Punong Grande kag Bo.7, base sa inisyal nga datos sang Banga Municipal Disaster Risk Reduction and Management Office.
May-angot sini, suno kay Banga MDRRM Action Officer Joseph Franco nga tungod sa pagragasa sang tubig baha nautod ang approach sang tatlo ka mga tulay sa Brgy. Lambingi, Lam-apus kag Lamba nga tigayon naman nga nabutangan sang temporaryo nga alagyan ang mga residente sa lugar.
Samtang daku naman suno pa ang natuga nga danyos sa dike protection sang Brgy. Improgo nga yara sa 30 ka metros ang nacollapse.
Base sa ila nga datos suno kay Franco, malala nga naapektuhan sang pagbaha ang apat ka mga barangay sa banwa nga amo ang Lambingi, Lam-apus, Lamba kag Improgo tungod sa paglapaw sang Banga River.
Sa subong suno kay MDRRM Action Officer Franco ginapinalisar nila ang ila nga datos sa natuga nga danyos sang pagbaha kon kinahanglan na nga magdeklarar sang state of calamity.
