Davao City – Dili ordinaryo kon dili usaka moderno nga klase sa balatian ang 2019 novel coronavirus (2019-nCoV) nga nibutho karon sa Wuhan, Hubei Province sa China nga mikutlo na og ubay-ubay’ng mga kinabuhi wala pay labot ang nilibo na ang nag-positibo.
Matud ni Associated Labor Union-Trade Union Congress of the Philippines (ALU-TUCP) spokesperson Alan Tanjusay, ang 2019-nCoV delikado nga matang sa balatian sanglit mamahimong mamatay ang usaka tawong mataptan niini.
Sa ulahing talaan, 213 na ang namatay ug kapin 9,000 ang nag-positibo sa kapin dosena na ka nasud ang naabtan ug katapusang nasud nakatala og susamang kaso mao ang Finland ug India.
Nakita karon ni Tanjusay ang dakung panginahanglon nga angay nang mas pahugtan ug istriktohan pa sa Bureau of Customs (BoC) ang mga imported second-hand clothings kun ‘ukay-ukay’ nga makasulod denhe sa Pilipinas gikan sa ubang kanasuran sama sa China, Vietnam, Thailand, Korea, Malaysia ug uban pang areas.
Dugang ni Tanjusay nga may posibilidad nga pinaagi sa mga ‘ukay-ukay,’ malagmit matakdan ang mga Pilipino sa 2019-nCoV nga sa karon gikunsidera na sa World Health Organization (WHO) nga usaka ‘global health emergency of international concern.’
Segun ni Tanjusay, seryoso ang 2019-nCoV sanglit dili lamang mga mananap ang hinungdan sa pagdaghan sa mga tawo nga nagkasakit apan lakip na usab ang human-to-human viral transmission.
Gidasig usab niini ang BoC nga bantayan og maayo ang mga sea ports aron walay ‘ukay-ukay’ nga makasulod sa Pilipinas karon nga mas nagkagrabe pa ang kaso sa 2019-nCoV didto sa China.
Gi-awhag karon ni Tanjusay ang gobyerno nga magpatuman na og travel ban batok sa tanang mga Chinese nationals ug papaulion na lamang ang mga Pilipino nga nanarbaho didto sa China diin nag-montar og quarantine facilities alang ngadto kanila.
RadyoMan Joel Viray
