21 ka mga NPA fighters nagsurender sa Lebak, Sultan Kudarat.

Nagsurender ang 21 ka mga former fighters sang New People’s Army (NPA) matapos ang madinalag-on nga negosasyon sang 6th Infantry Division kag Lebak Municipal Task Force to End Local Communist Armed Conflict (Lebak MTF-ELCAC). Ginpahayag ni Col. Eduardo Gubat, Commander sang 603rd Infantry Brigade nga ang nagsurender nga mga miyembro sang NPA ang ginapamunuan ni Ariel Odas Apang @ TATS, CO sang Dragon Fruit Platoon, East Daguma Front upod ang 20 ka mga miyembro sang platoon.
Dala sang mga ini sa pagsurender ang 21 ka mga armas luthang, assorted ammunition, kag mga war materials.
Suno naman kay Major General Juvymax Uy, Commander sang JTF Central kag 6th Infantry Division tungod sa pagsurender sang 21 naglab-ot na sa kabug-usan nga 60 ka mga former NPA fighters ang nagsurender sa JTF Central Joint Area of Operation halin Enero subong nga tuig.
Naglab-ot man sa 60 ka mga assorted firearms kag eksplosibo ang tigayon nga nasurender.
Nagapati si Major Gen Uy nga tungod sa panibag-o nga mass surrender sang mga miyembro sang NPA daku ang epekto sini sa paghina sang pwersa sang communist terrorist group sa rehiyon dose.
Ang nasambit nga mga former NPA rebels ang temporaryo nga ginbutang sa halfway houses sang Sultan Kudarat, samtang ginaproseso ang ayuda nga ihatag sa ila sa idalom sang Enhanced Comprehensive Local Integration Program (E-CLIP) sang gobyerno.
Samtang makabaton man sang immediate cash kag livelihood assistance halin kay Sultan Kudarat Governor Suharto Teng T. Mangudadatu kag Lebak Mayor Frederick Celestial ang 21 ka mga miyembro sang NPA agud mabuligan nga makaumpisa sila sang normal kag matawhay nga pangabuhi upod ang ila nga mga pamilya.

Facebook Comments