General Santos City–Mukabat sa 21 ka mga miyembro sa New People’s Army o NPA ang misurender sa militar nga sakop sa 73rd Infantry Battalion, Philippine Army.
Matud ni 1st Lt. Jerry Maborrang, Spokesperson sa 73rd Infantry Battalion, Philippine Army ang mga mitahan pulos miyembro sa guerilla Front 71-Far south Mindanao region nga nagalihukan sa Jose Abad Santos, Davao Occidental.
Bitbit sa mga nasampit ang managlahing matang sa armas sama nalang sa M14; Cal. 45; Garand rifle; 12 gauge Homemade Shotgun ug uban pa. dugang pa ni Maborrang nga ang mga nasampit ilawom sa pagdumala ni Kumander Yoyong.
Gibutyag usab ni 1st Lt. Maborrang nga trabaho sa mga nasampit ang pagpang-ambush matud pa sa tropa sa gobyerno nga musulod sa lugar ilawom sa ilang balwarti.
Sila usab ang tigpalit ug tighatud sa mga logistic sa walhong pundok. Aminado si Maborrang nga dakong kawad-on sa grupo sa NPA ang ingon ka daghang miyembro niini nga mibalik sa sabakan sa gobyerno. Pasabot matud pa niini nga mohina na ug sakto ang ilang pwersa diha sa kabukiran.
Usa sa mga rason ngayong mitahan ang 21 ka mga rebelde gumikan gihapon sa subrang kakapoy ug gutom samtang nagtaguan sa kabukiran.
Ila usab nakit-an matud pa ang dakong kausaban sa kinabuhi sa mga kanhing miyembro sa NPA nga una nang mitahan sa ilang kaugalingon. Gawas matud pa nga gihatagan sila sa gobyerno ug panginabuhian, gihatagan pa sila ug kapuy-an ingon man pinansyal nga tabang.
Napamatud-an usab nila nga dili tinuod ang kakunayng panghadlok kanila sa ilang mga opisyal nga kung sila magsurender sa gobyerno, sila pamatyon sa mga sundalo.
